حكايات تامر وباسل بين الحقيقة والسراب !

السلام عليكم ....

كيفكم ؟

بوست اليوم هو بوست كان لازم ينكتب من زمان كتير ... بس انا كنت بسكت من باب انو مش كل اشي بينرد عليه خصوصا اذا كان لا يتحق الرد لكن لما الالسن تطول والحكي يكتر فصار لازم عالاقل احكي مش لانو في اشي رح اكسبو بس احتراما لناس كتير بحبها وحبتني ...

كتير بوصلني حكي عن انو حكايات تامر وباسل لا تتعدى كونها الخرافة ! وبان تلك الحكايات بكل ما حملت من الم كانت مجرد اكاذيب وخيالات !!

سبحان الله يا عالم : الواحد بكزب عليكم بتصدقوه ولما بحكيلكم الحقيقة بتكذبوه !!

فعلا ارضاء الناس غاية لا تدرك !!!

بليز كل الي بيقرأ البوست هاد ركزوا معي كتير منيح :

اول شي ايام حياتي وايام حياة باسل الي حكينالكم عنها حملت الكثير من الفراغ ... في ايام كانت فارغة وايام حافلة زي حياة اي حدا منكم ... لما بلشنا نحكي بالحكايات وكتبنا معكم القصص اول بأول كانت القصة مليئة بالاحداث تقريبا بكل حلقة لانو من الاكيد يعني ما رح اقعد اقولكم مر اليوم الاول ما عملت شي والتاني ما عملت شي والتالت ما عملت شي ....

لذلك قررنا انا وباسل نكتب الاحداث المهمة الي صارت بحياتنا والي طبعا مش شرط تكون مهمة لالكم كمان ... في بداية الموضوع يمكن ما كنا كتير متمكنين لكن انا شايف انه في نص الحكاية تقريبا المستوى الكتابي والابداعي فعلا صار راقي بغض النظر عن المحتوى خصوصا في قصص باسل ...

ناس تانية بتقول انو الحياة الي كتبنا عنها كتير كزب ومش موجودة وانها كلها من افكارنا !!!

هادا حكي تافه لا يستحق الرد عليه لانو انا مش مستني من حدا انو يصدق شو مستواي او مستوى باسل وما بهمنا نحنا شو بنظر الناس !! كل واحد عارف مستواه وعارف اهله وعارفكيف بيعيش!! عشان هيك انو الناس تصدق او ما تصدق فهالشي ما رح يغير من وجه الحقيقة شي !!

وبالنهاية الي حبنا مشان طبيعة الحياة تاعتنا فهادا شخص ما حبنا لذاتنا ونحنا مش بحاجة هيك نوع من الحب ....

في بعض الناس قالت انو انا كتير بشع وانو باسل شخصية من خيالي وانا الي كنت بكتب قصصو وانو انا حتى عمري ما لمست رجل وانو الي كتبتو هو عبارة عن الاحلام الي كنت بتمنى انو انا اعيشها على ارض الواقع !!

بخصوص شكلي ... الجمال موضوع نسبي ... ممكن واحد يشوفني كتير بشع وما بنشاف وممكن واحد يشوفني كتير حلو و امور والسبب طبعا انو الموضوع عبارة عن " تايب " ... ازا انا كنت مش حلو لشخص معين فهادا لا يعني انو انا مش حلو بالاجماع لكن يعني انو انا مش تايب هالشخص ... لكن انا عن نفسي بشوف حالي سوبر كيوت ... والي عزز عندي هالشعور الناس الي حبيتهم وحبوني والناس الي بتعجب فيي باي مكان بروحو ... طبعا مش عم بقول انو انا فلقة قمر لكن بقول انو شكلي كيوت ...

بخصوص باسل ، بحب احكي للناس الي اتهمونا انو شخصية خيالية ... يعني ام سوري وجد سوري مقدما بس بجد هادا قمة الغباء الي ممكن الواحد يسمعو بحياتو ...

كان واضح جدا اختلاف طريقة السرد بين قصتي وقصة باسل ... واضح الاسلوب الادبي المتفاوت ... وواضح اكتر الروح الداخلية الي بتنكتب فيها كل قصة ... فقصصي انا دايما متعلقة بالله وبالحب ... بينما قصص باسل كان معظمها لعب ولهو ... وهادا لحالو كافي انو يكشف انو هدول شخصين مش شخص !

باسل هو نور حياتي ... شمعة ربنا خلاها تضوي طريقي ولولاه كان حياتي رح تكون كتير اصعب وانا الحمدلله سعيد انو هلا معي بلندن زي ما كان معي بعمان ...

بخصوص العلاقات الجسدية ، يا ريت لو كنت ما عملت اشي فعلا ... يمكن هادا هو الادعاء الوحيد الي كنت بجد بتمنى انو يكون مزبوط ... وعموما الله يغفرلنا جميعا !

اظن هيك رديت عالكل ... بس قبل ما اختم هالموضوع للابد ... انا بشر ... يمكن كزبت باشيا بسيطة متل اسمي ومكان سكني وبعض التفاصيل التافهة الي ما بتضر بمصداقية الحكايات ومتلي عمل باسل وكان الهدف هو بس انو نحافظ على خصوصيتنا ... لكن عمرنا ما كزبنا باي شي بخصوص حياتنا او اشكالنا او قصص الحب الي عشناها ...

انا قابلت احد المدونين لما كنت في الامارت ولو بدي بقدر اخليه يحكي للناس كلها على الي شافو معي ويحكي رايو فيي بكل سراحة لكن انا طلبت منو انو ما نحكي بالموضوع لانو ما بدي حدا يفكر انو انا بعمل دعاية لنفسي ... وهالشخص كتير علاقتي معو بتهمني وبدي احكيلو من خلال هالبوست انو انا بجد مشتاقلووو ...

بالنهاية الي بصدق اهلا وسهلا والي ما بصدق للي قالتو ليلى !

ملاحظة : الي ما بيعرف شو قالت ليلى يبعتلي ايميل وانا برد عليه وبقولو !

محبكم

تامر